Centre Cultural Occitan de l'Albigés

Lo Centre Cultural Occitan de l’Albigés (CCOA) es una associacion lèi 1901 nascuda en 1969 dins Albigés e federada a l’Institut d’Estudis Occitans, coma cercle local. Lo CCOA es doncas estacat a l’IEO de Tarn, a l’IEO Regional OPM, e a l’IEO Federal. La tòca principala es de mantèner, promòure e difusir la lenga e la cultura occitanas dins la vila d’Albi e dins l’Albigés. L’associacion es gerida per una còla de benevòles e e emplega doas personas. 

Sas activitats son divèrsas : 
– cors de lenga
– talhièrs setmanièrs o mensuals pels aderents : cant, teatre, dança, conversacion, literatura, presentacion d’un libre, ràdio, tricòt, paleografia, volontariat per la lenga
– activitats ponctualas : conferéncias, lecturas, mòstras, presentacions de libres, …
– eveniments incontornables : las Solencas, la Janada, la Dictada
– recerca e edicion d’obratge (Ròcaguda, lo Coronèl Teyssier…)
– bibliotèca e centre de ressorgas
– librariá

Dempuèi 2010, l’associacion CCOA ocupa l’ala drecha de l’Ostal Ròcaguda, al 28 de la carrièra Ròcaguda a Albi, qu’aculhís tanben lo Centre d’art contemporanèu Le LAIT fins a 2021, e, fins a 2020, lo sèti d’Arpège et Trémolo, associacion organizatritz – entre autres – del festenal Pause Guitare Sud-Ouest. L’Ostal Ròcaguda foguèt readobat en 2008 par la Comuna d’Albi per permetre l’installacion d’aquelas estructuras, plan conegudas dins la vila.

Aquel luòc atenent al Pargue Ròcaguda èra l’Ostal particular de l’Amiral de Ròcaguda. Enric-Pascal de Ròcaguda es una de las figuras de la vila d’Albi, a l’encòp marin, òme de letras e erudit del sègle XVIII. Retirat a Albi a l’alba del sègle XIX, se consacra alara a d’estudis scientifics e literaris, e s’interèssa a la lenga e a la literatura de l’Edat Mejan, e mai que mai a la dels Trobadors. Escriurà alara Le Parnasse occitanien” e “L’Essai d’un glossaire occitanien”. A sa mòrt en 1834, daissèt sa bibliotèca, son Ostal e sas proprietats a la vila d’Albi. Lo pargue de l’Amiral venguèt un pargue public. En 1908, la bibliotèca municipala d’Albi s’installa dins l’Ostal Ròcaguda, recampant de fons fòrça rics, dont la colleccion de l’Amiral Ròcaguda. I demorarà fins a 2001, a la dubertura de la mediatèca Pierre Almaric.

A son installacion, lo CCOA donèt alara lo nom de Centre Occitan Ròcaguda (lo COR) a son local. L’associacion faguèt, en seguida, un grand trabalh de recèrca sul personatge, que daissèt tanben d’escriches en lenga occitana. Foguèt doncas decidit de dedicar l’annada 2013 a l’Amiral de Ròcaguda. Una mòstra figuèt creada e mantuns obratges foguèron editats per CCOA : Henri Paschal de Rochegude : Fragments d’universel, Textes osées / Tèxtes pebrats, Lo romanista Rochegude, Cambriolage chez M. de Rochegude.

Lo Centre Occitan Ròcaguda es a l’encòp un luòc d’exposicion, una librariá, una bibliotèca/centre de ressorgas, e un luòc d’acuèlh d’animacion e d’accion culturala de tota mena.